Lo lop e l'anheu

'N anheu qu'estauviava la set
Un jorn vòu 'nar beure 'na vetz
Dins lo corrent d'una aiga pura.
Un lop que ne 'viá pas d'enguera dejunat,
Un pauc pus naut s'era ponat
Per atendre quauqua aventura.
"De quau drech, petit insolent,
Venes-tu treblar mon brevatge ?
Tant d'audàcia a ton atge
Merita chastiment.
 -Monsenhor, vos demande èscusa;
Quo es vrai, i'ai tòrt d'aver 'gut set,
Quand Vòstra Majestat m'accusa;
Mas l'aiga ven d'ela a me,
E, quand 'na vetz l'a pres sa corsa,
'La ne monta pus vers sa sorça.
Vos 'n prege fasetz atencion
Que ieu sei dins lo bas dau riu,
Que vòstra Grandor es plaçada
Pus naut que me mai d'una sestairada,
E que per consequent ne pòde, Monsenhor,
Granolhar son abeurador.
- Taisa-te ! sabe çò que dise;
Mai i'aime ben qu'un vormós moralise !
Ieu sabe que de me t'as dich dau mau antan.
- Monsenhor, v'esnidetz pas tant
E ! n'i a pas dos mes que ieu teste.
- Tu'n as mentit ! ieu t'ò repete:
Si quò n'es pas te, quo es ton frair.
- Sei filh unique de ma mair.
- Quo es donc quauqu'un de ta chena de raça;
Vos ne 'chabatz jamai de me balhar la chaça,
Vos, vòstres bargiers, vòstres chens
Ne fatz mas me servir d'enueg.
Ilhs m'ò an dich, ni mai ieu sabe;
Se fai temps que tot aquò 'chabe."
En mesme temps, mon lop 'grafa l'anhèu,
Que 'viá ben greletat tot queu temps dins sa peu,
Coma l'amanda dins sa còca;
Eu lo n'emporta e lo vos cròca
Dins lo beu fons d'una forest,
Sens d'autra forma de procés.

Queu conte n'es pas fach per rire;
Escotatz ben çò qu'eu vòu dire:
Un riche es totjorn lo pus fòrt ;
Un paubre, contra se, es segur d'aver tòrt.
V'auriatz beu credar venjança,
Quo es totjorn entau pertot;
La feblessa e l'endigença
Fan pechat d'aver rason.

 

Jan-Baptista Focaud