Pagina d'avant Pagina d'apres Ensenhador
Quela pita enquesta sus la cosina d'autres còps fit facha per doas rasons: la cosina de tots los jorns a totjorn estat lo trabalh de la femna e au contrari de la cosina deus grands cosiniers, 'l'es sovent mespresada.
E pertant, quo es un art tan malaisat coma 'n autre, quo es un luòc d'invencion e de creacion per las femnas, quò juga un ròtle essenciau dins la vita deu monde e quo es una partida considerabla de nòstra cultura occitana.
La cosina es l'expression d'una identitat, coma la musica o la dança.
L'enquesta es limitada dins l'espaci e per lo nombre de temuenhs: quatre femnas e dos òmes deu vilatge d'Assit, sus la comuna de Manòc (16500). Resten tots a Assit dempuei mai de quinze ans. N'i a un que l'i a nascut, los autres venen de vilatges alentorn.
L'enquesta pòrta sus la materia prumiera (frucha, legumes, vianda, ...), lo biais de la preparar (crua, cuecha, salada, ...), lo biais de la minjar (quoras e coma) e los gatges utilisats.
Los temuenhs trasmeten lor saber-faire coma ilhs iò an apres: en veire jorn apres jorn los biais de far de la mair o de la granda mair, en escotar loras paraulas.
Traparatz pas quí un libre de receptas. N'i en a, mas beucòp son conegudas. La preparacion de la noiridura, l'apreciacion deus temuenhs sus los plats, la lenga e lo biais de parlar deu minjar valen tant coma las receptas per comprener la vita e l'eime de la gent. Las receptas balhadas se fasian totas i a quaranta ans dins lo Confolentes. Mas d'aprep lo temps deus verbes empluiats per los temuenhs, òm veu que la mai bela part se fan totjorn en1984.
•Madama G. V.: a Assit dempuei quinze ans. Atge: quaranta-cinc ans.
•Madama S. B.: atge: cinquanta ans. La venguet a Assit en 1955 quand 'la se maridet coma
•Monsur G. B.: nascut dins lo vilatge, eu li a totjorn abitat. Obrier retirat. Atge: cinquanta ans.
•Madama L. R./ Monsur J.R.: dins lo vilatge dempuei cinquanta ans. Atge: quatre-vint cinc ans. (La Loisa Riveta e lo Jan Rivet).
•Madama M. G.: viu au molin dempuei seissanta ans. 'L'a mai de quatre-vint-cinc ans. (La Moniera).